މަސް ބަނަސް (ބްރުގްމޭން އިންސްޓެންޓް ޔީސްޓް)

 

މަސް ބަނަހަކީ އަވަށްޓެރި ސްރީލަންކާގެ މަޤްބޫލު ހެދިކާއެއް ކަމަށްވާ މާލު ޕާން އާއި ވަރަށްވެސް ގާތްކުރާ އެއްޗެކެވެ. މަހާއި އަލުވި އަޅައިގެން ހަދާ މަސް ބަނަހަކީ ހަވީރު ސަޔަށް ތައްޔާރު ކޮށްލެވިދާނެ މީރު އެއްޗެކެވެ.

އަހަރަމެން މި ރެސިޕީގައި ބޭނުންކޮށްފައި މިވަނީ، އަހަރަމެންގެ އެއް ބައިވެރިއެއް ކަމަށްވާ ސޯސަން ފިހާރައިގެ ފަރާތުން ލިބިފައިވާ، ބްރުގަމަން އިންސްޓެންޓް ޔީސްޓްއެވެ. މިއީ ހާއްސަކޮށް ޕާންކަހަލަ އެއްޗެހި ފިހުމަށް ބޭނުންކުރަން ނަން މަޝްހޫރު ބްރޭންޑެއެއްގެ ޔީސްޓްއެކެވެ. މީގެ ކޮންމެ ފޮށްޓެއްގައި 5 ކުދި ޕެކެޓު އިނދެއެވެ. އަދި މީގެ ކޮންމެ ޕެކެޓެއްގައި 11 ގްރާމް ޔީސްޓް ހުރެއެވެ. މިހެން ކަމުން މިއީ މަދު މީހުންނަށް ތަކެތި ތައްޔާރު ކުރަން ބޭނުން ކޮށްލަން ފަސޭހަ ޔީސްޓެކެވެ.

މި ރެސިޕީއިން ތައްޔާރުކުރެވޭނީ: 4 މަސް ބަނަސް

 

ބޭނުންވާ ތަކެތި:

ފުށްގަނޑު މޮޑުމަށް

½1 ޖޯޑު ފުށް

¾ ސައިސަމުސާ ބްރުގްމޭން އިންސްޓެންޓް ޔީސްޓް

¾ ސައިސަމުސާ ހަކުރު

½ ސައިސަމުސާ ލޮނު

¾ މޭޒުމަތީ ސަމުސާ ދިޔާކޮށްފައި ހުރި ބަޓަރު (ހިހޫކޮށް)

½ ޖޯޑު ތާފަނާ ފެން

1 ސައިސަމުސާ ތެޔޮ (ބޯތަށީގައި ހޭކުމަށް)

 

މަސްގަނޑު ހެދުމަށް:

1 މޭޒުމަތީ ސަމުސާ ތެޔޮ

1 މެދު ސައިޒް ތުނިކޮށް ކޮށާފައިހުރި ފިޔާ

5 ހަކަނދިފަތް (ތުނިކޮށް ކޮށާފައި)

½ ގިތެޔޮ މިރުސް (ތުނިކޮށް ކޮށާފައި)

¼ ސައިސަމުސާ ގާނާފައި ހުރި އިނގުރު

¼ ސައިސަމުސާ ގާނާފައި ހުރި ލޮނުމެދު

1 ސައިސަމުސާ ހަވާދު (އަހަރުމެން ބޭނުންކުރީ ކުކުޅު ހަވާދު)

¾ ސައިސަމުސާ ތެޅި މިރުސް (ނޫނީ ބޭނުން ވަރަކަށް)

1/8 ސައިސަމުސާ ރީނދޫ

½ މަސް ދަޅު

½ ޖޯޑު އަލުވި ފެނު ކެއްކުމަށް ފަހު ޗަސްކޮށްފައި

¼ ސައިސަމުސާ ލޮނު

1 ބިސް

 

ހަދާނެ ގޮތް:

1. ބޮޑު ބޯތަށްޓަކަށް ½1 ޖޯޑު ފުށް، ¾ ސައިސަމުސާ ބްރުގަމަން އިންސްޓެންޓް ޔީސްޓް، ¾ ސައިސަމުސާ ހަކުރު އަދި ½ ސައިސަމުސާ ލޮނު އަޅާފައި ސަމުސަލަކުން އެއްކޮށްލާށެވެ.

2. ދެން ¾ މޭޒުމަތީ ސަމުސާ ދިޔާކޮށްފައި ހުރި ބަޓަރު (ހިހޫކޮށް) ކޮޅު އަޅާ އެއްކޮށްލާށެވެ. ދެން މަޑު މަޑުން ½ ޖޯޑު ތާފަނާ ފެން އަޅަމުން އެއްކުރަމުން ގެންދާށެވެ. އެއްކުރާނީ ސަމުސަލަކުންނެވެ. އެއްކުރަމުން ގެންދާއިރު ކުޑަކޮށް ތަތްލަވާ ކަހަލަ ގޮތެއް ވާނެއެވެ.

3. ހުރިހާ ފެނެއް އަޅާ ނިމުމުން ފުށްގަނޑު މޮޑެން ފަށާށެވެ. މޮޑޭނީ ފުށްގަނޑު މަޑުވެ ބޯޅައެއްގެ ބައްޓަން އެއަށް ގެނެވެންދެނެވެ. މޮޑެމުން ދާއިރު ތަތްލުން ހުއްޓުވުމަށްޓަކައި ފުށްކޮޅެއް ބުރުއްސާލެވިދާނެއެވެ. އަހަރުމެންގެ ފުށްގަނޑު ރަނގަޅަށް މޮޑެވެން ނެގީ 5 މިނެޓެވެ.

4. ފުށްގަނޑު ލެވޭ ވަރުގެ ބޮޑު ސާފު ބޯތަށްޓެއްގައި 1 ސައިސަމުސާ ތެޔޮ އުނގުޅާލާށެވެ. ދެން އޭގެ ތެރޭގައި މޮޑުނު ފުށްގަނޑު ބާއްވާށެވެ. ދެން ސާފު ފޮތިގަނޑެއް ބޯތަށީގެ މަތީގައި އަޅައި ބޯތަށި މުޅިއެކުހެން ނިވާ ކޮށްލާށެވެ. ދެން އެގޮތަށް ގަޑިއެއްގެ އިރު ބަހައްޓާށެވެ. ގަޑި އެއްހާއިރު ވާއިރު ފުށްގަނޑު އޮންނާނީ ދެގުނައަށް ފުފިފައެވެ.

5. ތެއްޔަކަށް 1 މޭޒުމަތީ ސަމުސާ ތެޔޮ އަޅައި ހޫނު ކޮށްފައި އޭގެ ތެރެއަށް 1 މެދު ސައިޒް ތުނިކޮށް ކޮށާފައިހުރި ފިޔާ، 5 (ހަކަނދިފަތް ތުނިކޮށް ކޮށާފައި) އަދި ½ ގިތެޔޮ މިރުސް (ތުނިކޮށް ކޮށާފައި) އަޅާށެވެ.

6. ފިޔާކޮޅު މަޑުވަންދެން (3-4 މިނެޓު) ވަންދެން ކެއްކުމަށްފަހު ¼ ސައިސަމުސާ ގާނާފައި ހުރި އިނގުރާއި ¼ ސައިސަމުސާ ގާނާފައި ހުރި ލޮނުމެދު އަޅާ އެއްކޮށްލާށެވެ.

7. ބައި މިނެޓެއްހާއިރު ކައްކާލުމަށް ފަހު 1 ސައިސަމުސާ ހަވާދު (އަހަރަމެން ބޭނުންކުރީ ކުކުޅު ހަވާދު)، ¾ ސައިސަމުސާ ތެޅި މިރުސް (ނޫނީ ބޭނުން ވަރަކަށް)، 1/8 ސައިސަމުސާ ރީނދޫ އަޅާށެވެ.

8. މިނެޓެއްހާއިރު ހަލަމުން ކައްކާށެވެ. ދެން ½ މަސް ދަޅު، ½ ޖޯޑު އަލުވި (ފެނު ކެއްކުމަށް ފަހު ޗަސްކޮށްފައި) އަދި ¼ ސައިސަމުސާ ލޮނު އަޅާ އެއްކޮށްލާށެވެ.

9. އުނދުން މަތިން ބާލާފައި ހިހޫވާން ބަހައްޓާށެވެ. ހިހޫވީމައި 4 ބަޔަށް ބަހާލާށެވެ.

10. ބަނަސް ފިހަން ބޭނުން ކުރާނެ ތަބައް ތައްޔާރު ކުރާށެވެ. އަހަރުމެންގެ ތަބައް ތައްޔާރު ކުރީ އެލުމިނިއަމް ފޮއިލް އަޅާފައި އޭގެ މަތިން ކުޑަކޮށް ތެޔޮކޮޅެއް އުނގުޅާލައިގެންނެވެ.

11. ފުށްގަނޑު ދެ ގުނައަށް ފުފުމުން ގޮށްމުށުން ފުށްގަނޑަށް އޮބާލާ އޭގައި ހުރި އިތުރު ވައިތައް ބޭރުކޮށްލާށެވެ.

12. ފުށްގަނޑު 4 ބަޔަށް ބަހާލާށެވެ. ރޮށި ދަމާ އެތީގެ މައްޗަށް ކުޑަ ފުށް ކޮޅެއް ބުރުއްސާލާށެވެ. ދެން 4 ބަޔަށް ބެހި ފުށްގަނޑުގެ އެކަތިކޮޅު ނަގާ ރޮށްޓެއްހެން ދަމާލާށެވެ. ޑަޔަމީޓަރުގައި 5 އިންޗި ހުންނާނެ ވަރަށް ދަމާލީމައި ރަނގަޅުވާނެއެވެ.

13. ދެން ރޮށްޓެއްހެން ދެމި ފުށްކޮޅު ތަށްޓެއްގައި ބާއްވާފައި އޭގެ މެދުގައި 4 ބަޔަށް ބެހި މަސްގަނޑުން އެކަތިކޮޅު ބާއްވާށެވެ. ދެން ދެފަރާތުން ފަތް ޖަހާލާށެވެ. އެއްފަޅީގެ އަރިމަތި އަނެއް ފަޅީގެ މަތީގައި އޮންނާނެ ގޮތަށެވެ. މިހެން ފަތްޖެހީމައި ހީވާނީ ގޮށްޓެއްގެ ތެރެއަށް މަސްގަނޑު އަޅާފައި އޮތް ހެނެވެ. ދެން ބާކީ އޮތް ފަޅިވެސް ފަތް ޖަހާލާށެވެ. މިހާރު އެ އޮންނަންވާނީ ބޮޑު ބަޖިޔަލެއްގެ ބައްޓަމަށެވެ.

14. ދެން ކުރިން ތައްޔާރު ކުރި ތަބަކުގައި އެ ބާއްވާށެވެ. ތަބަކުގެ މަތިން ބަނަސް ފޮރުވޭނެ ގޮތަށް ސާފު ފޮތިގަނޑެއް އަޅާފައި ބާއްވާށެވެ.

15. ފުށްގަނޑާއި މަސްގަނޑު ހުސްވަންދެން 12، 13 އަދި 14 ގައި ވާގޮތަށް ފުށްގަނޑު ދަމައި އޭގޭ ތެރެއަށް މަސްއަޅައި ބަންދު ކުރާށެވެ. މަސް އަޅައި ބަންދުކުރެވެމުން ދާވަރަކަށް ތަބަކުގައި ފޮތިގަނޑުން ނިވާވާނެ ގޮތަށް ބަނަސްތައް އަތުރަމުން ގެންދާށެވެ. ފޮތިގަނޑުގެ އަޑީގައި 20 މިނެޓެއް ހާއިރު ބަނަސްތައް ބަހައްޓާށެވެ. އެއިރުން އަނެއްކާވެސް ބަނަސްތައް ފުފޭނެއެވެ.

16. 180 ޑިގްރީސް ސެލްސިއަސްއަށް އަވަން ހޫނު ކުރަން ޖައްސާށެވެ.

17. އެހެން ބޯތަށްޓެއްގައި 1 ބިސް ގިރާލާށެވެ. އަވަނަށް ފިހަން ލުމުގެ ކުރިން ތަބަކުގައި އަތުރާފައި ހުރި ބަނަސް ތަކުގެ މަތީގައި ބިސް އުނގުޅާލާށެވެ.

18. ހޫނު ކޮށްފައި ހުރި އަވަނުގެ މެދު ރެކުގައި ތަބަށް ބައިންދައިގެން ބަނަސް ތަކުގެ މައްޗަށް ރަން މުށި ކުލަ އަރަންދެން ފިހާށެވެ. އަހަރުމެންގެ ބަނަސްތައް ފިހެވުނީ 35 މިނެޓުންނެވެ. ގެންގުޅެނީ ކުޑަ އަވަނެއްނަމަ ދެތަބަކުގައި ފިހާގޮތަށް ތައްޔާރު ކުރެވިދާނެއެވެ. އެއް ތަބަކުގައި ހުރި ބަނަސް ތައް ފިހެވެންދެން އަނެއް ތަބަކުގެ މަތީގައި ފޮތިގަނޑު އަޅާފައި ބަހައްޓާށެވެ.