މަސް ބަނަސް

 

މަސް ބަނަހަކީ އަވަށްޓެރި ސްރީލަންކާގެ މަޤްބޫލު ހެދިކާއެއް ކަމަށްވާ މާލު ޕާން އާއި ވަރަށްވެސް ގާތްކުރާ އެއްޗެކެވެ. މަހާއި އަލުވި އަޅައިގެން ހަދާ މަސް ބަނަހަކީ ހަވީރު ސަޔަށް ތައްޔާރު ކޮށްލެވިދާނެ މީރު އެއްޗެކެވެ.

މި ރެސިޕީ ބަލައިގެން މަސް ބަނަސް ތައްޔާރު ކުރާނަމަ ބޭނުން ވަރަކަށް ކުޅި ކޮށްލާށެވެ. އަދި އަހަރުމެން މީގައި ކުކުޅު ހަވާދު ބޭނުން ކުރި ނަމަވެސް ބޭނުން ހަވާދެއް އޭގެ ބަދަލުގައި ބޭނުން ކޮށްލާށެވެ.

ރެސިޕީ ފެށުމުގެ ކުރިން އަދި ބުނެލަން މުހިއްމު ކަމެއްވެސް އެބައޮތެވެ. އަހަރުމެން މި ރެސިޕީގައި ބޭނުން ކުރީ އިންސްޓަންޓް ޔީސްޓްއެވެ. އެއީ އާއްމުކޮށް ފިހާރަ ތަކުގައި ވިއްކަން ހުންނަ ޔީސްޓްގެ ބާވަތެކެވެ. އެއީ ދެން ވިއްކަން ހުންނަ ޔީސްޓްގެ ބާވަތް ކަމަށްވާ އެކްޓިވް ޑްރައި ޔީސްޓްއާއި ތަފާތު އެއްޗެކެވެ. އެކްޓިވް ޑްރައި ޔީސްޓް އަޅައިގެން މި ރެސިޕީ އަހަރުމެން ޓެސްޓެއް ނުކުރަމެވެ.

  

މި ރެސިޕީއިން ތައްޔާރު ކުރެވޭނީ: 8 ބަނަހެވެ.

 

ބޭނުންވާ ތަކެތި:

ފުށްގަނޑު މޮޑުމަށް:

3 ޖޯޑު ފުށް

1 ½ ސައިސަމުސާ އިންސްޓަންޓް ޔީސްޓް

1 ½ ސައިސަމުސާ ހަކުރު

1 ސައިސަމުސާ ލޮނު

1 ½ މޭޒުމަތީ ސަމުސާ ދިޔާކޮށްފައި ހުރި ބަޓަރު (ހިހޫކޮށް)

1 ޖޯޑު ތާފަނާ ފެން

1 ސައިސަމުސާ ތެޔޮ

މަސްގަނޑު ހެދުމަށް:

1 ފިޔާ

10 ހިކަނދިފަތް

½ ގިތެޔޮ މިރުސް (ނޫނީ ބޭނުން ވަރަކަށް)

1 ½ މޭޒުމަތީ ސަމުސާ ތެޔޮ

½ ސައިސަމުސާ ގާނާފައި ހުރި އިނގުރު

½ ސައިސަމުސާ ގާނާފައި ހުރި ލޮނުމެދު

2 ސައިސަމުސާ ހަވާދު (އަހަރުމެން ބޭނުން ކުރީ ކުކުޅު)

1 ½ ސައިސަމުސާ ތެޅި މިރުސް (ނޫނީ ބޭނުން ވަރަކަށް)

¼ ސައިސަމުސާ ރީނދޫ

1 މަސް ދަޅު

2 އަލުވި ފެނު ކެއްކުމަށް ފަހު ޗަސްކޮށްފައި (ޗަސްކުރީމައި 1 ޖޯޑު)

½ ސައިސަމުސާ ލޮނު (ނޫނީ ބޭނުން ވަރަކަށް)

1 ބިސް

 

ހަދާނެ ގޮތް:

1. ފުށާއި، ޔީސްޓްއާއި، ހަކުރާއި، ލޮނު ބޯތަށްޓަކަށް އަޅައި އެއްކޮށްލާށެވެ.

2. ދެން ބަޓަރު ކޮޅު އަޅާ އެއްކޮށްލާށެވެ. ދެން މަޑު މަޑުން ފެން އަޅަމުން އެއްކުރަމުން ގެންދާށެވެ. އެއްކުރާނީ އަތުންނެވެ. އެއްކުރަމުން ގެންދާއިރު ކުޑަކޮށް ތަތްލަވާ ކަހަލަ ގޮތެއް ވާނެއެވެ.

3. ހުރިހާ ފެނެއް އަޅާ ނިމުމުން ފުށްގަނޑު މޮޑެން ފަށާށެވެ. މޮޑޭނީ ފުށްގަނޑު މަޑުވެ ބޯޅައެއްގެ ބައްޓަން އެއަށް ގެނެވެންދެނެވެ. މޮޑެމުން ދާއިރު ތަތްލުން ހުއްޓުވުމަށް ޓަކައި ފުށްކޮޅެއް ބުރުއްސާލެވިދާނެއެވެ. އަހަރުމެން އެކި ފަހަރު މަތިން ގާތްގަނޑަކަށް 3 މޭޒުމަތީ ސަމުސަލުގެ ފުށް މިގޮތަށް ބޭނުން ކުރީމެވެ. އަހަރުމެންގެ ފުށްގަނޑު ރަނގަޅަށް މޮޑެވެން ނެގީ 5 މިނެޓެވެ.

4. ފުށްގަނޑު ލެވޭ ވަރުގެ ބޮޑު ސާފު ބޯތަށްޓެއްގައި ތެޔޮ އުނގުޅާލާށެވެ. ދެން އޭގެ ތެރޭގައި މޮޑުނު ފުށްގަނޑު ބާއްވާށެވެ. ދެން ސާފު ފޮތިގަނޑެއް ބޯތަށީގެ މަތީގައި އަޅައި ބޯތަށި މުޅިއެކުހެން ނިވާ ކޮށްލާށެވެ. ދެން އެގޮތަށް ގަޑިއެއްގެ އިރު ބަހައްޓާށެވެ. ގަޑި އެއްހާއިރު ވާއިރު ފުށްގަނޑު އޮންނާނީ ދެގުނައަށް ފުފިފައެވެ.

5. ފުށްގަނޑު ފުފެމުން ދާއިރު ފިޔާ އަދި ހިކަނދިފަތް ކުދި ކުދިކޮށް ކޮށާށެވެ. ގިތެޔޮ މިރުސް ވެސް ތުނިކޮށް ކޮށާށެވެ.

6. ތެއްޔަކަށް ތެޔޮ އަޅައި ހޫނު ކޮށްފައި އޭގެ ތެރެއަށް ފިޔާ، ހިކަނދިފަތް އަދި ގިތެޔޮ މިރުސް އަޅާށެވެ.

7. ފިޔާކޮޅު މަޑުވަންދެން ކެއްކުމަށްފަހު އިނގުރާއި ލޮނުމެދު އަޅާ އެއްކޮށްލާށެވެ.

8. ބައި މިނެޓެއްހާއިރު ކައްކާލުމަށް ފަހު ހަވާދާއި، ތެޅިމިރުހާއި، ރީނދޫ އަޅާށެވެ.

9. މިނެޓެއްހާއިރު ހަލަމުން ކައްކާށެވެ. ދެން މަސް ދަޅާއި އަލުވި އަޅާ އެއްކޮށްލާށެވެ.

10. ރަހަ ބަލާލާފައި ބޭނުން ވާވަރަކަށް ލޮނު އަޅާށެވެ. އެހެން ރަހަތަށްވެސް ބޭނުން ވާ ގޮތަކަށް ހެޔޮވަރު ކޮށްލާށެވެ.

11. އުނދުން މަތިން ބާލާފައި ހިހޫވާން ބަހައްޓާށެވެ. ހިހޫވީމައި 8 ބަޔަށް ބަހާލާށެވެ.

12. ބަނަސް ފިހަން ބޭނުން ކުރާނެ ތަބައް ތައްޔާރު ކުރާށެވެ. އަހަރުމެންގެ ތަބައް ތައްޔާރު ކުރީ އެލުމިނިއަމް ފޮއިލް އަޅާފައި އޭގެ މަތިން ކުޑަކޮށް ތެޔޮކޮޅެއް އުނގުޅާލައިގެންނެވެ.

13. ފުށްގަނޑު ދެ ގުނައަށް ފުފުމުން ގޮށްމުށުން ފުށްގަނޑަށް އޮބާލާ އޭގައި ހުރި އިތުރު ވައިތައް ބޭރުކޮށްލާށެވެ.

14. ފުށްގަނޑު 8 ބަޔަށް ބަހާލާށެވެ.

15. ރޮށި ދަމާ އެތީގެ މައްޗަށް ކުޑަ ފުށް ކޮޅެއް ބުރުއްސާލާށެވެ. ދެން 8 ބަޔަށް ބެހި ފުށްގަނޑުގެ އެކަތިކޮޅު ނަގާ ރޮށްޓެއްހެން ދަމާލާށެވެ. ޑަޔަމީޓަރުގައި 5 އިންޗި ހުންނާނެ ވަރަށް ދަމާލީމައި ރަނގަޅުވާނެއެވެ.

16. ދެން ރޮށްޓެއްހެން ދެމި ފުށްކޮޅު ތަށްޓެއްގައި ބާއްވާފައި އޭގެ މެދުގައި 8 ބަޔަށް ބެހި މަސްގަނޑުން އެކަތިކޮޅު ބާއްވާށެވެ. ދެން ދެފަރާތުން ފަތް ޖަހާލާށެވެ. އެއްފަޅީގެ އަރިމަތި އަނެއް ފަޅީގެ މަތީގައި އޮންނާނެ ގޮތަށެވެ. މިހެން ފަތްޖެހީމައި ހީވާނީ ގޮށްޓެއްގެ ތެރެއަށް މަސްގަނޑު އަޅާފައި އޮތް ހެނެވެ. ދެން ބާކީ އޮތް ފަޅިވެސް ފަތް ޖަހާލާށެވެ. މިހާރު އެ އޮންނަންވާނީ ބޮޑު ބަޖިޔަލެއްގެ ބައްޓަމަށެވެ.

17. ދެން ކުރިން ތައްޔާރު ކުރި ތަބަކުގައި އެ ބާއްވާށެވެ. ތަބަކުގެ މަތިން ބަނަސް ފޮރުވޭނެ ގޮތަށް ސާފު ފޮތިގަނޑެއް އަޅާފައި ބާއްވާށެވެ.

18. ފުށްގަނޑާއި މަސްގަނޑު ހުސްވަންދެން 15 އަދި 16 ގައި ވާގޮތަށް ފުށްގަނޑު ދަމައި އޭގޭ ތެރެއަށް މަސްއަޅައި ބަންދު ކުރާށެވެ. މަސް އަޅައި ބަންދުކުރެވެމުން ދާވަރަކަށް ތަބަކުގައި ފޮތިގަނޑުން ނިވާވާނެ ގޮތަށް ބަނަސްތައް އަތުރަމުން ގެންދާށެވެ.

19. ފޮތިގަނޑުގެ އަޑީގައި 20 މިނެޓެއް ހާއިރު ބަނަސްތައް ބަހައްޓާށެވެ. އެއިރުން އަނެއްކާވެސް ބަނަސްތައް ފުފޭނެއެވެ.

20. 180 ޑިގްރީސް ސެލްސިއަސްއަށް އަވަން ހޫނު ކުރަން ޖައްސާށެވެ.

21. އެހެން ބޯތަށްޓެއްގައި ބިސް ގިރާލާށެވެ.

22. އަވަނަށް ފިހަން ލުމުގެ ކުރިން ތަބަކުގައި އަތުރާފައި ހުރި ބަނަސް ތަކުގެ މަތީގައި ބިސް އުނގުޅާލާށެވެ.

23. ހޫނު ކޮށްފައި ހުރި އަވަނުގެ މެދު ރެކުގައި ތަބަށް ބައިންދައިގެން ބަނަސް ތަކުގެ މައްޗަށް ރަން މުށި ކުލަ އަރަންދެން ފިހާށެވެ. އަހަރުމެންގެ ބަނަސްތައް ފިހެވުނީ 35 މިނެޓުންނެވެ. ގެންގުޅެނީ ކުޑަ އަވަނެއްނަމަ ދެތަބަކުގައި ފިހާގޮތަށް ތައްޔާރު ކުރެވިދާނެއެވެ. އެއް ތަބަކުގައި ހުރި ބަނަސް ތައް ފިހެވެންދެން އަނެއް ތަބަކުގެ މަތީގައި ފޮތިގަނޑު އަޅާފައި ބަހައްޓާށެވެ.